Maharashtra Government Scheme | मुख्यमंत्री माझी लाडकी बहीण योजनेच्या लाखो लाभार्थ्यांसाठी वर्षाअखेरीची मोठी भेट मिळण्याची शक्यता सध्या प्रचंड चर्चेत आहे. डिसेंबर महिन्यात नेहमीप्रमाणे येणारा ₹1500 चा हप्ता न पडता, यावेळी थेट ₹3000 सन्माननिधी जमा होऊ शकतो, अशी माहिती विविध माध्यमांमधून समोर येत आहे. नोव्हेंबर महिन्याचा हप्ता अजूनही जमा न झाल्याने लाभार्थ्यांमध्ये नाराजी आणि संभ्रम निर्माण झाला होता. पण आता सरकार नोव्हेंबर व डिसेंबर हे दोन्ही हप्ते एकत्र जमा करण्याच्या तयारीत असल्याचे चर्चा रंगत आहे.
स्थानिक स्वराज्य संस्थांच्या आगामी निवडणुकांचा परिणाम म्हणून निधी जारी होण्यात विलंब झाला असावा, अशीही शक्यता व्यक्त केली जाते. याआधीही विधानसभा निवडणुकीच्या काळात सरकारने सलग दोन महिन्यांची रक्कम एकत्र लाभार्थ्यांच्या खात्यात जमा केली होती. त्यामुळे यंदाही तसाच पॅटर्न दिसण्याची शक्यता अधिक मानली जाते. सूत्रांचे म्हणणे आहे की, पुढील आठवड्यात सरकार लाडक्या बहिणींच्या खात्यात रक्कम जमा करण्याची शक्यता आहे, मात्र अद्याप यासंदर्भात कोणतीही अधिकृत घोषणा राज्य सरकारकडून करण्यात आलेली नाही, हेही तितकेच खरे.
दरम्यान, ‘ई-केवायसी’ प्रक्रिया सर्व लाभार्थ्यांसाठी सक्त करण्यात आली आहे. योजनेचा लाभ नियमित सुरू ठेवायचा असल्यास प्रत्येक लाभार्थ्याने तात्काळ ई-केवायसी पूर्ण करणे आवश्यक आहे. ई-केवायसी पूर्ण न झालेल्या खात्यांवर पुढील निधी थांबवला जाऊ शकतो. यासाठी लाभार्थ्यांनी ladakibahin.maharashtra.gov.in या अधिकृत संकेतस्थळावर जाऊन पडताळणी करणे गरजेचे आहे.
सरकारकडून अधिकृत घोषणेची वाट पाहताना लाखो लाडक्या बहिणींचा श्वास रोखला आहे. कारण महिनाअखेरीची घरखर्चाची गणितं, नात्यागोत्यांच्या गरजा, बाजारातील महागाई आणि रोजच्या संघर्षात हे 1500 किंवा एकत्र येणारे 3000 रुपये अनेक कुटुंबांसाठी मोठा आधार ठरतात. वर्षाचा शेवट जवळ आला आहे… आणि आशेची एक छोटीशी किरण घेऊन महिला अजूनही मोबाईलवर बँक मेसेजची वाट पाहत आहेत.
सरकार पुढील आठवड्यात हा निर्णय जाहीर करेल का? की अजून काही दिवस वाट पाहावी लागणार? उत्तर काहीही असो… पण या सन्माननिधीची प्रतीक्षा मात्र लाखो बहिणींच्या जगण्यातला एक महत्वाचा धागा बनली आहे.